拜人：「無反用家冇得唔買」試用Nissin i60A

Index

1. 介紹

2. NAS系統及TTL

3. 體積及造工

4. 火力、功能與操作

5. 輸出測試

6. NAS系統試用

7. 總結

雖然無反以輕便為主，但近年多個推無反嘅品牌推出專業級機身及鏡頭，唔再局限於玩票性質。不過閃光燈卻不太獲重視，各品牌出品一係火力功能唔夠，一係支燈重過機連鏡。Nissin i60A正正衝住無反機而嚟，所以先推最多無反用家嘅Sony版本，不但功能、火力唔輸蝕畀原廠頂級燈，體積亦比原廠中階燈更輕巧。單從規格睇就似乎好掂，但實際有幾好用就等我拜人試試。

支援NAS系統玩TTL無線遙閃

Nissin i60A燈頭有相當於24 ~ 200mm嘅變焦力，zoom到200mm最高輸出達GN60@ISO100，跟燈仲有散光罩畀用家打Bounce或者用1Xmm超廣角鏡頭時用。閃燈唔連電重量只有300g，燈頭向前時高度只有95mm。除支援原廠TTL輸出控制，閃燈亦內置自動測光A模式同手動M模式控制，相比原廠燈可能仲多咗選擇（因為部份原廠燈冇A模式）。另外，i60A支援原廠機光控遙控功能，直接用Sony相機內置閃光燈作TTL控制遙閃。留意i60A嘅「A」字代表支援Nissin Air System（NAS），即係Nissin自家無線控制系統。

◆ Nissin i60A，睇落好似入門燈仔。

◆ 散光板同反光板係獨立分開。

◆ 燈頭左右轉動當然冇問題。

◆ 唔好睇佢燈仔細細，其實係用4粒2A電池，回電速度、電量同原廠頂級燈比係冇分別。

◆ 同其他頂級燈一樣可接外置電箱加快回電速度，據廠方表示接口係跟住接腳變換，即係支援返原廠個電箱。

◆ 跟燈嚟仲有個袋、燈座同埋一個散光罩。

體積及造工

既然i60A主打體積細小，咁不如先同Sony原廠最頂級、同樣有GN60火力嘅HVL-F60M閃光燈比較一下：

◆ 左為Sony HVL-F60M，右為Nissin i60A，體型差別非常大。

◆ 由於i60A（右）可以Zoom至相當於200mm，所以燈頭反而較長。

從上面嘅圖大家都見到i60A係細支咗幾多，咁細支咗又會唔會易爛咗呢？雖然筆者冇本錢做drop test，不過一拎支i60A上手，就感覺到支鏡外殼幾厚幾硬淨，厚厚嘅電池蓋好穩陣。另外燈頭同燈身為咗「偷位」而設計嘅金屬關節架相當堅固，雖然關節係冇鎖定，但亦因為咁，當唔小心撞到燈頭時就唔會咁易撞爛。整體感覺扎實可靠，甚至比部份原廠燈更好。

火力、功能與操作

依家個個牌子支頂級燈都自稱有GN60，咁其實係咪支支火力一樣先？呢方面有兩點大家要計埋嘅，首先係支燈嘅燈頭係幾多mm，第二就喺ISO幾多時有呢個數。i60A嘅GN60係指喺200mm同ISO100嘅時候，相比原廠HVL-F60M嘅GN60係在於105mm/ISO100嘅情況，火力有差別。不過多間大廠嘅頂級燈同樣講緊類似數字，i60A唔算輸蝕。

◆ 唔計散光板同散光罩，燈頭本身可以於24 ~ 200mm範圍變焦。不過筆者覺得如果係24 ~ 105mm而換返燈頭細啲會仲正。

◆ 金屬關節

功能方面，i60A有齊晒原廠鏡所有功能，包括TTL遙閃、高速快門同步、拍片用LED，同埋外接電池箱。另外，佢仲新增A模式自動輸出控制、光敏同步遙閃及支援NAS，比原廠HVL-F60M功能更多。

要數Nissin同其他品牌嘅閃燈最唔同嘅地方，肯定會係操作。i60A沿用i40雙轉盤操作設計，在此之上加以改良。左邊主模式轉盤鬆緊度控制得恰到好處，唔需要好大力轉動，但又唔會因為太輕而容易誤轉。右邊嘅設定轉盤不單加入十字掣功能更方便，亦同時新增鎖掣功能，避免喺相機袋「拎出拎入」嗰陣錯誤調校。相比原廠閃光燈有十幾個掣，兼夾經常要長按入唔同模式調校，i60A操作真係講得上更快更直觀。

◆ 採用類似同廠i40嘅雙轉盤設計，但更好用。

◆ 內置埋LED畀你拍片用，光度一般。

https://www.youtube.com/watch?v=teYRiU-T_uo

輸出測試

通常大家都擔心非原廠閃光燈配搭原廠相機作TTL搖控時會唔準，有啲朋友可能會留意埋色溫，不過基於調校相機嘅白平衡唔難，而家仍然在意嘅人唔算多。以下筆者會用i60A同原廠HVL-F60M做比較，以相機TTL測光控制輸出，分別以直閃同側閃作比較，效果如下：

• 

• 

A7R2 + HVL-F60M，直打 / A7R2 + i60A，直打

• 

• 

A7R2 + HVL-F60M，側打白牆反射 / A7R2 + i60A，側打白牆反射

從上面幾幅圖大家可以睇到，用i60A喺Sony機上面會比原廠燈輸出高少少。不過要留意每個品牌相機嘅TTL測光都有出入，遲吓i60A嘅其他版本有可能都會出現唔同效果。不過筆者用咗Sony咁耐，一直覺得佢閃光燈嘅TTL測光控制偏暗，呢支i60A似乎反而比用原廠更準。另外，兩支燈嘅色溫明顯有差別，因此用i60A時相機白平衡唔太適合設定去「閃光燈」嘅一檔。

NAS系統試用

近年廠商紛紛開始加入2.4GHz無線頻道遙控閃光功能，相比早期光敏式遙控閃燈，最重要係接收效果好好多。就算你放得遠啲，或者搵嘢遮住支燈仍然能夠遙控。然而各品牌發展自家2.4GHz頻道遙閃系統速度緩慢，反觀幾間為人認識嘅副廠，經已推出咗不少非常成熟嘅產品。Nissin Air System（NAS）就係Nissin自行開發嘅無線遙控閃燈系統，同其他副廠主要有三點唔同：第一，NAS系統入面嘅燈唔可以用嚟做引發，用家必須透過Air 1引發器遙控NAS閃燈。第二，NAS系統每支燈只能連接一個引發器，如果用其他引發器Pair支燈，原本個引發器就會遙控唔到。第三，由於NAS係用返相機內置遙閃系統，若然需要使用TTL測光遙閃，相機必須先啟動遙閃功能。

◆ NAS系統嘅核心—Air 1觸發器，好似唔係好靚仔。

◆ Air 1其實好易用，但筆者覺得TTL模式時如果有+/-0EV嘅檔次顯示會更清晰。

https://www.youtube.com/watch?v=luwKaoVNjPI

由於配對好之後閃光燈會自動同Air 1連接，用家只需要喺Air 1上面設定係TTL定手動、再分ABC組設定輸出就得（當然你仲要將啲燈設定遙控模式同set做邊組），非常易用。講返i60A，用NAS遙閃時只要將左邊模式轉盤轉到A、B或者C檔就可以。NAS畀筆者感覺係非常易用，但唔可以同朋友share咁用，因為啲燈唔可以同時畀兩個Air 1控制器pair到。呢點其實有辣有唔辣，因為筆者真係親身試過喺公眾場合玩飛燈同人撞channel，如果當時用NAS就唔會有問題。再者預先pair定就唔使次次檢查有冇錯channel，慳返唔少時間。

值得提一提嘅係，一個Air 1可同時遙控唔同接腳嘅Nissin Air系作TTL控制，如果閣下係單反無反雙修嘅朋友，可考慮買兩支唔同腳嘅i60A，平時各有高火力燈可以用，當有需要時就遙控兩支燈打出各種效果，一舉兩得。

https://www.youtube.com/watch?v=Q114-2f4CSo

總結

老實講，喺i60A身上幾乎搵唔到咩缺點：體積輕便，功能齊全，造工唔錯，價錢合理，暫時嚟講不二之選。雖然支燈首批只有Sony腳，但據廠方預告會出齊現時市面最流行嘅C、N、Sony、m4/3，更會有Fujifilm接腳，相信連原廠頂級燈都未有嘅Fujifilm用家聽到尤其開心。

NAS方面，筆者欣賞佢成個系統設計令用家感覺方便，唯獨喺Air 1上設定ABC組各個輸出時要撳個set掣次數比較多，未夠直接，但總括都可以講得上比現時市面上所有同類系統簡便。目前唯一問題係NAS系統只能「自私閃」，唔可以同朋友share，如果你預計有機會同朋友share閃，咁就要停一停諗一諗喇。

Original post on: https://article.hkgolden.com/articles/article.aspx?id=22407&catid=36

Facebook: https://www.facebook.com/fatlobrian